O Concello de Monforte dispuxo unha partida de medio millón de euros para repartir entre as familias de Monforte. En forma de bonos de consumo, a intención do equipo que lidera o socialista José Tomé é que ese diñeiro acabe en mans de calquera empresario ou comerciante do municipio, os máis afectados polo covid-19. Pechado o prazo de presentación de solicitudes, só o 60% das familias empadroadas pediron tal axuda.
José Tomé non quixo valorar números e menos reflexionar os motivos que tivo o 40% restante das unidades familiares monfortinas para non acollerse a este programa. Limitouse a dicir que ese 60% correspóndese co 80% da poboación total do municipio.
Iso suporía que unha maioría das unidades familiares dun ou dous membros non tramitaron a pertinente solicitude.
PRIMEIROS PAGOS. Os servizos técnicos municipais resolveron a peticións presentadas entre o 25 de xuño e o 5 de xullo. Foi a primeira remesa que se corresponde cos primeiros 1.935 documentos rexistrados.
En total, recibirán 125.000 euros dese medio millón orzado.
Os monfortinos que se interesaron por este programa poden comprobar se forman parte dos beneficiarios na páxina web municipal nas listaxes que se colgarán na casa consistorial, o edificio multiusos e a casa da cultura.
A entrega dos bonos comezará o luns e farase no multiusos en horario de oito e media da mañá a dúas e media da tarde. Haberá catro mesas diferentes para impedir unha aglomeración indeseada de veciños.
TRANQUILIDADE. José Tomé espera que nas próximas semanas acabe a revisión das peticións restantes.
Tranquilizou á cidadanía dicindo que calquera defecto de forma pode ser emendado nun prazo de 10 días hábiles e que é o propio Concello o que se pon en contacto telefónico co afectado para que o arranxe.
