A décimosexta edición do Castañazo Rock que se celebrou este fin de semana en Chantada, un encontro que quere manter vivo o espírito do movemento bravú aderezándoo coas novas correntes musicais, foi todo un éxito de participación. A organización asegurou que durante os dous días que durou o evento contabilizaron unhas 10.000 persoas.
Mostra do interese que ten este festival foi o feito de que non houbese nin unha praza libre en hoteis, pensións e casas de turismo rural de Chantada e a súa contorna, sen contar con aqueles que apostaron pola acampada en lugares habilitados para ese efecto como alternativa.
O responsable da asociación que organiza o Castañazo Rock, Ibán Gómez, mostrouse encantado cos resultados obtidos en canto a participación.
Tamén destacou a gran acollida que tivo unha pulseira electrónica coa que os participantes no festival podían realizar pagos dentro do recinto. Este dispositivo tamén serviu para controlar en tempo real o aforamento dentro do recinto en que tiveron lugar os concertos, un total de doce a cargo doutras tantas bandas de música .
Gómez mostrouse, ademais, moi orgulloso polo feito de que non se producise ningunha situación de acoso machista durante o evento. Nesta edición do Castañazo abriuse un Punto Lila, como se coñece o lugar no que as mulleres poden denunciar calquera situación que consideren inapropiada cara á súa persoa, non rexistrándose ningunha denuncia.
Por todo, Ibán Gómez non dubidou en indicar que foi "o mellor Castañazo da historia, ainda que pretendemos melloralo no 2019".