Un mozo irrompe nunha xoiería de Pontevedra e leva un botín de 10.000 euros en alfaias

As policías Nacional e Local manteñen activo un operativo de busca e captura dun mozo duns 30 anos e moreno como presunto autor dun roubo nunha xoiería da rúa Benito Corbal, tras o que conseguiu un botín valorado nuns 10.000 euros. O reloxo aínda non marcaba as 17.30 horas cando se produciu o suceso.

Unha clienta estaba a mirar unhas bandexas con aneis e colgantes no negocio Joya 36 cando, de súpeto, sentiu a presenza doutra persoa rozándolle as costas. Foi entón cando o ladrón, do que só pode dicir que era moreno, arrastrou con violencia unha das bandexas e fuxiu á carreira.

A clienta sufriu un golpe que lle provocou unha caída sen graves consecuencias. "Eu estaba ao meu e non me decatei de que entraba alguén. Pero en canto o vin coller as cousas asusteime e deume un ataque de ansiedade", relatou a afectada aínda nerviosa polo suceso.

Non quere dar os seus datos por medo a sufrir represalias e espera que se colla canto antes ao delincuente. Di que o atraco a marcou e reafírmase en que non pensa "volver entrar soa nunha xoiería". 

No momento do atraco, no local atopábanse dúas empregadas, que declinaron falar sobre o ocorrido ata que recibisen autorización dos seus xefes. Nun primeiro momento, polos datos facilitados polas testemuñas, a Policía pensou que o autor podería ser un delincuente habitual, polo que inspeccionou unha vivenda derruida na praza da Verdura onde se sospeita que adoita ocultar os botíns dos seus roubos. Con todo, esta identificación resultou negativa, polo que continúa a procura do ladrón.