¿E Rafael Louzán?

A Deputación de Pontevedra acolleu este martes o último pleno da actual corporación á espera de que o vindeiro venres se celebre a sesión plenaria constitutiva, na que os novos deputados tomarán posesión dos seus cargos. En apenas un minuto liquidouse este acto formal de peche de actas.

A anécdota da xornada foi a ausencia do presidente en funcións, Rafael Louzán, quen se atopaba en Madrid como máximo responsable da federación galega de fútbol, na asemblea xeral.

Cumprido o trámite e finalizado o pleno os portavoces de cada un dos grupos, fixeron un breve discurso agradecendo o traballo desenvolvido nos últimos anos, desexando "sorte" a aqueles compañeiros que non formarán parte da nova corporación.
Estes últimos fixéronse unha foto de familia como recordo antes de abandonar o Pazo provincial.

PACTOS. O portavoz socialista na Deputación e secretario provincial do PSdeG, Santos Héctor, destacou o "bo e inmellorable clima" no que se desenvolven as conversacións abertas co BNG de cara a formar o futuro goberno na administración provincial.
Santos Héctor celebrou a "coincidencia" de ambas as formacións para que a Deputación sexa "máis transparente e máis pegada á realidade dos veciños e na confianza dun goberno único formado por dúas forzas políticas".