Carpetazo definitivo da xustiza á desaparición de Sonia Iglesias

A Audiencia de Pontevedra confirmou o sobresemento provisional da investigación sobre a desaparición de Sonia Iglesias tras desestimar os recursos presentados pola Fiscalía e pola súa familia, informaron fontes do Tribunal Superior de Xustiza de Galicia. Tras o anuncio do arquivo, o fiscal xefe de Pontevedra, Juan Carlos Aladro, insistiu en que "nin a Fiscalía nin a Policía van deixar de investigar esta desaparición".

O arquivo provisional implica a suspensión do proceso en tanto non aparezan novas probas. O Xulgado de Violencia contra a Muller ditara o sobresemento pero tanto o ministerio fiscal como os familiares de Sonia Iglesias, desaparecida en agosto de 2010, pedían que se lle practicase á súa exparella, Julio Araújo, o chamado test da verdade.

Este tribunal considerou que non existen "indicios sólidos" para continuar co procedemento, no que Araújo foi chamado a declarar como imputado e despois levantouse a súa imputación. A proba P-300 ou de Potencial Cognitivo Evocado, popularmente coñecida como test da verdade, rexistra picos na actividade cerebral da persoa a quen se practica, o que podería servir, por exemplo, para determinar se coñece un lugar que se lle mostre nunha fotografía.

O seu uso é polémico desde o punto de vista xurídico, porque pode entenderse como unha autoincriminación non buscada, o que iría contra o dereito de defensa protexido constitucionalmente. O caso levaba case catro anos aberto no momento en que se tomou a decisión do sobresemento provisional, pois mesmo se revisaron varias veces unhas gravacións de seguridade que non arroxaron luz sobre o asunto e non apareceu ningunha outra pista que levara aos investigadores na boa dirección.