A presidenta da Deputación de Pontevedra, Carmela Silva, mostrou a súa "total e absoluta" indignación polos "intolerables" comentarios de índole "machista" que, ao seu xuízo, realizou o presidente da Xunta de Galicia, Alberto Núñez Feijóo, nos últimos días.
En rolda de prensa, Silva considerou "gravísimo" que Núñez Feijóo dirixiuse á portavoz do BNG, Ana Pontón, "dicindo que está necesitada", algo que segundo a dirixente socialista "só cabe na cabeza de alguén que pensa en masculino exclusivamente".
Silva considerou "gravísimo" que Núñez Feijóo se dirixise á portavoz do BNG "dicindo que está necesitada"
A iso sumou a "gracieta" que, denunciou a presidenta provincial, fixo o presidente galego nunha entrega de premios en Pontevedra, asegurando que o envellecemento poboacional de Galicia "estaba en que agora se tiñan menos fillos" e dicindo que "xa sabiamos o que había que facer".
"Ata agora, que eu saiba, só as mulleres podemos ter fillos", explicou Carmela Silva, que entende que Núñez Feijóo "responsabiliza" ás mulleres da baixa natalidade en Galicia.
Só unha cabeza "cavernícola e machista", sinalou a dirixente socialista, "pode dicir estas cousas" e asegurou que con este comentario "sentín unha profunda vergoña" porque destacou que non o dixo calquera e encima contouno coma se fose un chiste".
Silva engadiu que resultan "intolerables" estas faltas "de respecto" cara ás mulleres e o comportamento de persoas que "coas súas palabras", dixo, intentan que as mulleres "volvamos ás cavernas" onde, segundo a presidenta provincial, "eramos invisibilizadas, silenciadas e estereotipadas".
O problema demográfico en Galicia, apuntou a presidenta da Deputación, "é porque o mundo avanzou" e as mulleres accederon ao mercado laboral e "non temos un papel na vida que é ter fillos e coidar da casa".
Ademais, recordou que a Xunta "non toma medidas" para que haxa suficientes" centros de educación infantil que "garantan" a conciliación e os horarios laborais son "incompatibles" con esa conciliación ou que os salarios "non permite construír vidas que dean garantías e estabilidade" á hora de forma unha familia.
