A procura da muller desaparecida o pasado 7 de abril na cidade de Ourense, Belén R.E. (57 anos), amplíase a outras localidades, tamén fóra de Galicia, despois de que unha nova testemuña situase a unha muller que predicaba o fin do mundo en Miranda de Ebro (Burgos).
En declaracións aos medios, o subdelegado de Goberno, Roberto Castro, confirmou que testemuñas relataron este mércores ver a unha muller nesta localidade predicando o fin do mundo, polo que as forzas de seguridade puxéronse en contacto coa Policía Nacional a fin de comprobar -con fotos enviadas desde a comisaría de Ourense- se é a mesma persoa.
No entanto, precisou que "polas explicacións" recibidas, non se trataría da mesma persoa xa que non coinciden trazos como a cor do pelo.
Polo momento, a Policía, concretou, segue analizando "todas as posibilidades" e mantéñense "todas as hipóteses abertas" nun caso que foi cualificado desde o inicio de "inquietante".
A muller estaría vinculada a seitas consideradas non destrutivas, circunstancia, dixo Castro, que non xera "tranquilidade". "Aínda que non promove o suicidio, este tipo de ideas fixas, preocupacións esotéricas, non xera tranquilidade", senón "inquietude" abundou o subdelegado.
Polo que se sabe ata agora, a Policía cre que se trata dunha muller dinámica, activa e que se move ben no rural, en manualidades, estética e con facilidade nas relacións persoais. "Non é unha persoa huraña ou pechada en si mesma", abundou.
Desde que se puxo en marcha o operativo o pasado venres, participaron nos labores de procura axentes de Policía Nacional, Local, Protección Civil, os cales rastrexaron tanto en helicóptero e con lanchas acuáticas diferentes zonas de Ourense, onde foi vista, e tamén da provincia.
Tamén estiveron patrullas caninas de Madrid, especializadas na procura de cadáveres e en atopar o rastro de persoas no vento.
A partir de agora, recoñeceu que aínda que se manterá o dispositivo de procura "non será coa mesma intensidade" tras subliñar que é "complicado manter" o operativo no tempo polo que espera que o resultado das investigacións e novas testemuñas "poidan arroxar algo de luz" sobre este caso.
Neste momento, non se descarta que poida estar viva ou morta nin tampouco unha marcha voluntaria.
A procura da muller desaparecida en Ourense amplíase fóra de Galicia
Belén R.E. podería estar vinculada a seitas non destrutivas, algo que "inquieta" aos investigadores
