Xa se pode pedir o voto por correo para as eleccións galegas

O voto por correo para as eleccións autonómicas que se celebrarán o domingo 25 de setembro xa se pode solicitar, segundo informou Correos nun comunicado. Os cidadáns que queiran participar por correspondencia nese proceso electoral —ou no vasco que terá lugar na mesma data— poden solicitar ata o 15 de setembro, en calquera oficina postal, o certificado da súa inscrición no censo electoral de ambas as comunidades, requisito imprescindible para poder emitir o voto.

Esta solicitude debe ser realizada persoalmente por cada elector, salvo en caso de enfermidade ou discapacidade acreditadas mediante certificación médica oficial, circunstancia na que poderá ser presentada en nome do elector por outra persoa autorizada notarial ou consularmente a eses efectos. Ao formular a petición, os interesados deben acreditar a súa personalidade ante o empregado da oficina postal co DNI, pasaporte ou carné de conducir orixinais.

Correos depositaraas nas Delegacións Provinciais da Oficina do Censo Electoral e estas enviarán aos solicitantes, entre o 5 e o 18 de setembro, a documentación necesaria para que poidan exercer o voto por correo.