A Xunta prioriza 42 millóns en axudas a municipios que faciliten a implantación de empresas

O Goberno galego deu este xoves o visto e prace aos incentivos que terán os concellos que faciliten a instalación de novas empresas no seu territorio, aos que ofrecerá vantaxes para acceder a un primeiro paquete de 42 millóns en axudas autonómicas en distintas ordes. Estes municipios, denominados "emprendedores", terán 20 puntos máis na solicitude destas axudas autonómicas, como talleres de emprego, por exemplo.

O presidente da Xunta, Alberto Núñez Feijóo, explicou en conferencia de prensa que este acordo desenvolve o pacto alcanzado coa Fegamp e pretende facilitar a instalación de novas iniciativas empresariais en Galicia. Deste xeito, os municipios que acepten rebaixar a estes novos proxectos de nova implantación os seus impostos de actividades económicas, de bens inmobles, e se comprometan a dar licenzas de obra nun máximo de trinta días, entre outras medidas, terán 20 puntos máis que outros que non o fagan nas solicitudes de determinadas ordes de axudas autonómicas.

Os novos proxectos empresariais que cren menos de 10 empregados terán unha bonificación en impostos do 50 por cento, que será do 75 por cento para os que cren entre 11 e 20 novos empregos e ata o 95 por cento para aquelas iniciativas con máis de 20 empregados. "Se os municipios renuncian a recadar máis (por empresas novas) a Xunta é consciente e por iso os discriminará positivamente nas ordes de axudas", defendeu Núñez Feijóo.

Ademais dos talleres de emprego, outras ordes nas que se poderán beneficiar os municipios son a mellora de equipamentos parques empresariais ou a participación en mercados excelentes para financiar prazas de abastos, entre outras.

A participación nestas iniciativas "pode ser interesante para despois non lamentarse e ver como industrias non quedan ou se van fóra de Galicia", advertiu Núñez Feijóo, que concluíu: "Se non traballamos todos xuntos non somos máis fortes, como nos gustaría". Afirmou que desde a posta en marcha das oficinas Doing Business (Facendo Negocios) postas en marcha para detectar trabas administrativas desenvolvéronse proxectos "por 330 millóns de euros".

O Goberno galego resolveu tamén a convocatoria de axudas para que mozos en desemprego menores de 30 anos de municipios sen centros homologados poidan recibir formación. Deste xeito, celebraranse 32 cursos destas características en 27 municipios dos que se beneficiarán 500 mozos, que obterán un certificado de profesionalidade válido en toda España. Segundo Núñez Feijóo, hai marxe para emprender no rural, que conta con moitos activos que aínda non están ao nivel que a Xunta desexaría.

Ademais, o Executivo autonómico deu o visto e prace á firma do convenio coa USC para cofinanciar a redacción do proxecto básico da nova Facultade de Medicina, que prevé integrar nun espazo, o da Choupana en Santiago, a actividade docente, investigadora e clínica. A Xunta achegará 0,438 millóns para a redacción deste proxecto, tras o que se fará o proxecto construtivo e finalmente levarase a cabo.

Entre outras actuacións, o Goberno galego declarou Ben de Interese Cultural (BIC) o castro de Fazouro, en Foz (Lugo), na categoría de xacemento arqueolóxico e aprobou declarar de utilidade pública a expropiación de 66 novas parcelas para conectar o polígono de Areas, en Tui, coa VAC Tui-A Guarda e a autovía A-55, Vigo-O Porriño.