A Xunta e o Concello ultiman obras en centros educativos

A pesar de que a Xunta e o Concello pretendían aproveitar o verán para levar a cabo obras en varios centros educativos, factores administrativos e orzamentarios demoraron estes traballos, o que provocará que nalgún caso váianse a culminar unha vez comece o curso académico.

A intervención de maior envergadura é a que contratou, por máis de 410.000 euros a Xunta no CEIP das Mercedes. Segundo explican fontes desta administración, a previsión é que a obra exterior estea terminada nas próximas tres semanas, mentres que as de dentro pódense prolongar ata decembro. Prodúcese así un lixeiro atraso sobre os plans iniciais, segundo os cales a actuación exterior estaría concluída antes de finalizar agosto. En canto ao interior, só afectarán á zona de baños dunha planta de entre todos os espazos que estarán en uso a partir do inicio do curso, dado que o traballo fundamental que se desenvolve é a construción dunha segunda planta.

Ademais destas obras, a Xunta tamén destina outros 200.000 euros para melloras en catro institutos (Lucus Augusti, Ollos Grandes, Ánxel Fole e Politécnico) e tres colexios (o Mallo Mallo, o de Albeiros e o de Paradai). Salvo as dúas últimas, o resto foron anunciadas estes días, a escasas dúas semanas de que empece o curso tanto en primaria como en secundaria.

CONCELLO. Pola súa banda, o Concello de Lugo tivo que esperar a que un pleno extraordinario celebrado o 18 de agosto desbloquease os fondos para poder levar a cabo a contratación de diversas obras en centros educativos.

Entre os investimentos municipais, por un importe global de 90.000 euros, sobresaen as obras de reparación e mellora da escola infantil municipal Gregorio Sanz, á que se destinan case 60.000 euros. Mentres, para a limpeza e recheo de areneros de todos os colexios públicos, do CEI Fingoi 2 e das catro garderías do Concello consígnanse uns 9.000 euros e, nun terceiro contrato, de 21.574 euros, inclúese a colocación dun zócalo cerámico no comedor do colexio Anexa e o posterior pintado dos restos, así como a reparación de xogos infantís,peches metálicos e do muro de formigón perimetral deste centro. Por outra banda, o Concello tamén mellorará os colexios da Ponte, o CEIP Menéndez Pelayo e o de Quiroga Ballesteros.

O edil de educación, Manuel Núñez, explica que "se non se fixeron xa estes traballos foi porque non houbo acordo coa oposición para ter un orzamento propio —non prorrogado— en 2017" aínda que subliña que se trata en todos os casos de contratos menores en cuxas propostas de gasto os técnicos municipais xa foran avanzando antes de celebrarse o pleno que liberou o orzamento para "axilizar ao máximo" o proceso. "E se non dá tempo de que as obras se fagan antes do inicio de curso, faranse polas tardes ou nos festivos cando non haxa actividade docente", conclúe Núñez.