A asociación Centro Comercial Histórico de Viveiro impulsa un ano máis o exitoso programa de visitas guiadas durante a Semana Santa, unha actividade que realiza en colaboración coa Xunta de Confrarías e á fronte da cal está o guía turístico Suso Martínez.
O punto de partida é sempre a Praza Maior de Viveiro e non é necesario anotarse para participar, tan só basta con presentarse no lugar. O luns, martes e mércores arrincan ás seis da tarde, o Xoves Santo ás doce do mediodía, o Venres Santo á unha, o sábado ás cinco e media e o domingo á unha.
As visitas permiten coñecer a historia da cidade e a súa Semana Santa, declarada Festa de Interese Turístico Internacional, e son diferentes cada día, polo que moitas persoas repiten. Ademais, son gratuítas.
Viveiro ofrece visitas guiadas gratuítas en Semana Santa
A asociación Centro Comercial Histórico impulsa esta actividade, que dirixe o guía Suso Martínez