Vecinos das rúas Avenida de Galicia e Sarria de Monforte cuxas vivendas están próximas ao río As Malloadas, o que verte as súas augas no Cabe á altura do parque dos Condes, mostraron o seu malestar polo que consideran un «estado de abandono» da canle, cheo de maleza e onde, aseguran, aniñan ratas de gran tamaño, polo que solicitaron a súa limpeza, reclamación que fixeran en xuño sen éxito.
O alcalde monfortino, o nacionalista Severino Rodríguez, sinalou onte que a administración local non ten competencias para actuar neste regato que atravesa o centro da cidade, algo que lle corresponde á Confederación Hidrográfica Miño-Sil.
Rodríguez manifestou que lle enviou escritos ao organismo de conca reclamando a súa limpeza, á vez que emprazou aos veciños afectados a realizar o mesmo a fin de intentar que a confederación se decida a acometer os traballos.
Tamén en xuño outros monfortinos, neste caso os residentes no barrio dos Chaos, reclamaran que se cortase a maleza existente no mesmo arroio á altura da ponte dos Picos, do século XVI e de gran valor artístico, porque a herba case o tapaba por completo. Neste caso procedeuse a unha pequena limpeza da canle, insuficiente a xuízo dos afectados.
Desde 2005
A última vez que a confederación hidrográfica levou a cabo un intensivo plan de mellora do estado das canles que atravesan Monforte foi en 2005, cando actuara nas Malloadas, Zapardiel, Rioseco e Carballo, labores para as que se destinaron naquel entón 35.000 euros.
O que quedou en suspenso desde hai seis anos era un plan que manexaba o Concello para pór en valor os arroios no seu armazón urbano, orzado en 1,5 millóns de euros.
