Vecinos do barrio de Brieiro, na parroquia vivariense de San Xulián de Faro, están «indignados» co goberno municipal vivariense pola falta, desde hai polo menos un mes, de iluminación pública nun tramo de 250 metros na estrada que vai de Area a Faro, segundo fai público o edil do grupo municipal do Partido Popular Celestino García Paz.
O popular asegura que recibiron «numerosas queixas» tanto dos veciños do lugar como dos que transitan pola zona, «sobre todo nesta época estival na que a xente adoita pasear por estes lugares». García Paz engade que os veciños expresan de novo o seu malestar «logo de levar máis dun mes sen iluminación pública» e «a pesar dos reiterados avisos ao Concello para que reparase devandita avaría».
A avaría afecta o tramo de iluminación da estrada entre Area e Faro, pasada a igrexa parroquial e o Hostal Alameda, ao longo de 250 metros «contados». «Non es que sea un solo punto, ya que en esa distancia son siete u ocho, que ayer [por el martes] a las diez de la noche no alumbraban y que llevan sin hacerlo desde hace por lo menos un mes», asegurou o concelleiro popular.
García Paz engade que os afectados avisaron aos responsables municipais «como mínimo dúas veces, pero ata a data non hai solución, o que evidencia unha falta de interese por parte do Concello», opina. O edil reitera que se trata dunha zona con casas e chalés preto da estrada, viaria que usan diariamente transeúntes que agora se atopan de noite en penumbra».
Celeridade
Celestino García Paz, en nome do grupo municipal do Partido Popular, esixe ao goberno local e á responsable da área de iluminación pública, que agora é o nacionalista Bernardo Fraga, que solucionen este problema o máis rápido posible para que o barrio de Brieiro volva á normalidade. Cren que a actuación debe ser urxente xa que ao seu xuízo a falta de luz supón perigo na estrada, «co consabido risco de que se poidan producir accidentes».
