A pequena Uxía López Cobo non poderá someterse á cirurxía para ter a súa man definitiva ata que cumpra 18 anos. Con todo, nas próximas semanas viaxará de novo a Barcelona para que lle sexa implantada unha prótese funcional que supón unha evolución sobre a que ten na actualidade e permitiralle realizar determinadas funcións como a prensil.
A familia de Uxía López atópase estes días en Quiroga, onde reside habitualmente, logo de viaxar a Valencia para acceder a unha consulta co prestixioso médico Pedro Cavadas. Este especialista confirmoulles que é posible facerlle unha reconstrución de man á pequena, que naceu sen a extremidade, con tecido da súa nai, doante compatible. Con todo, Cavadas comunicoulles que a operación non poderá realizarse ata que a nena teña 18 anos por diferentes factores, algúns de carácter médico. Por exemplo, a pequena non ten restos de boneca, polo que ese aspecto complica o proceso.
Un sorteo para recadar fondos para Adrián
O centro de maiores de Novacaixagalicia de Monforte sorteará unha camiseta de Diego López, porteiro do Real Madrid, para colaborar cos gastos da rehabilitación do neno Adrián García Casado. O pequeno, veciño de Monforte, está a someterse a un tratamento con hormonas de crecemento para recuperarse dunha parálise cerebral que sofre desde pequeno. A súa familia e o colexio no que estuda, o Novo de Monforte, teñen en marcha unha campaña de recadación de fondos e o centro de maiores súmase á iniciativa co sorteo dunha camiseta. As persoas que queiran participar no sorteo da camiseta poden comprar unha rifa por un euro a partir do luns no centro, no colexio Novo, a librería Galaxia e a imprenta Fénix. O sorteo será o 10 de maio.