Unións Agrarias (UU.AA.) asegura que o catastrazo impulsado polo Goberno central pode disparar os pagos anuais na provincia pola contribución rústica dos 2.892.633 euros do 2014 -os últimos datos oficiais - ata os 29 millóns, "dez veces máis". Para evitar ese pau ao sector agrogandeiro, pide aos concellos que apliquen a ese Ibi rústico o tipo mínimo (o 0,3%) e bonificacións.
A responsable da área de desenvolvemento rural de UU.AA. Jacobo Feijoo, denunciou o luns esa problemática e alertou de que moitos lucenses aínda non son conscientes porque aínda non lles pasaron os recibos actualizados.
Explicou que a razón dese aumento "desproporcionado" das cantidades esixidas reside en que agora hai que pagar por naves, granxas e outras instalacións agrogandeiras que estaban antes exentas, xa que só pagábase a contribución rústica por leiras. Enmarcou eses cambios na revisión de bens iniciada polo Catastro no 2013 e dixo que xa se completou en 22 concellos, está en marcha noutros 30 e seguirá despois no resto da provincia.
Sobre a "gran desinformación" sobre o problema, Feijoo explicou que moitos lucenses cren que se resolve cando pagan unha taxa de 60 euros por cada ben inscrito, polo que se sorprenden despois cos novos recibos, máis caros ao ter os valores actualizados.
Recordou que tamén se está revisando o valor catastral das vivendas -que computan con outro tipo, dentro do Ibi urbano- e que nese caso tamén se examinan os pagos dos últimos catros anos. Cifrou en 57,6 millóns o que se pagou por ese concepto na provincia en 2014 e augurou que esa cantidade tamén crecerá.
APOIO MUNICIPAL. Feijoo dixo que, pola crise no sector, é necesario que os concellos revisen os seus tipos. Incidiu en que poden fixalo entre un 0,3 e un 0,9% e pediu que apliquen o mínimo, ademais de bonificacións. Como exemplo, indicou que no caso dunha nave valorada en 100.000 euros, suporía pasar de pagar 900 ao ano co tipo alto a 40 ou 50, co baixo e descontos.
Acompañouno José Antonio Diéguez, presidente de Ventonoso, quen informou de que hai seis concellos lucenses que aplican agora tipo altos, por encima do 0,7% (A Pastoriza, A Pobra do Brollón, Viveiro, Meira, Mondoñedo e Cospeito), e outros 38 con tipos medios, e que teñen xa que logo marxe para reducilos.
Insistiu en que non sairían nunca perdendo, xa que a contribución rústica sempre implicará para os concellos máis diñeiro, porque os bens polos que hai que pagar estaban antes exentos. Precisamente, UU.AA. pedirá unha reunión con responsables da Fegam para explicar esta situación e involucrar aos concellos ante estas «cantidades abusivas».
O sindicato insta, ademais, a que cando se reciban notificacións do Catastro revísense ben os valores reflectidos por se hai erros, xa que hai un prazo de 15 días para alegar e despois outro dun mes para pór un recurso.
"DISPARATE" COAS BOLSAS. Jacobo Feijoo tamén alertou de que perigan as bolsas para os fillos de agricultores e gandeiros, porque o Goberno fixou limiares patrimoniais vinculados a eses bens rústicos, polo que familias con granxas en crises poden perder esa axuda (denéganse se se pasan os 13.130 euros de valoración dese patrimonio por cada membro familiar). Tachou a cláusula de «disparate», ao non terse en conta o rendemento dos bens, e dixo que UU.AA. pedirá ao presidente galego, Alberto Núñez Feijóo, que medie ante o Goberno para retirala.
O sindicato alerta de que 44 dos 67 concellos lucenses aplican na actualidade tipos medios ou altos na contribución rústica
