Uns 90 comercios lucirán o venres as súas mellores galas na Noite Aberta

Uns 90 comercios do centro da cidade agasallarán este venres aos seus clientes con descontos, agasallos, música, cátering ou cócteles durante a oitava edición da Noite Aberta, unha iniciativa da Asociación de Autónomas de Lugo coa que pretende dinamizar o sector.

Os participantes nesta xornada comercial lúdica, que prolongarán o horario de peche ata a medianoite, lucirán á entrada unha alfombra de cor rosa.

A Noite Aberta, que conta coa colaboración do Concello de Lugo, foi presentada este martes pola concelleira de economía, Ana Prieto; a presidenta da Asociación de Autónomas, Marta López, e o da Federación de Comercio lucense, José María Seijas.

Ana Prieto, que destacou as bondades do comercio de proximidade, no que coincidiu tamén José María Seijas, fixo un chamamento aos lucenses para que se sumen a esta iniciativa e sobre todo para que "merquen en Lugo".

"O Concello está ao lado do comercio local e imos da súa man en todas as iniciativas que impulsen este sector, como a celebración da Noite Aberta", afirmou a edil de economía.

A Noite Aberta, que terá animación rueira, ademais de nos comercios, é unha das actividades que organiza a Asociación de Autónomas de Lugo que, como no caso de Comercio na Rúa ou Street Market, teñen unha gran aceptación entre os lucenses, segundo puxo de manifesto Marta López.