Unha curtametraxe de animación realizada ou curso pasado por un grupo de alumnos de cuarto de ESO do CPI Doutor Daniel Monxe, de Navia de Suarna, foi distinguida co premio Crearte, que convoca o Ministerio de Cultura e que está dotado de 23.000 euros.
Non é o primeiro galardón que recibe este traballo, pois tamén quedou en segunda posición no certame Educacompostela, que convocan o Concello de Santiago e Nova Escola Galega, dotado de 900 euros.
Ambos os galardóns premian as iniciativas didácticas innovadoras e orixinais, e pretenden fomentar a creatividade no ámbito educativo.
A curtametraxe foi elaborada por sete alumnos de Ética -Quique, Eva, Magali, Kevin, Laura, Aitor e Belén-, dirixidos polo profesor David González. A iniciativa xurdiu dous rapaces, e a única condición que puxo o mestre foi que o traballo se axustara ós contidos dq materia. Os mozos decidiron entón abordar os problemas mundiais en comparación coas preocupacións dunha familia de clase media.
Tras elaborar un guión, todo estaba listo para a fase máis interesante: a elaboración dos decorados e os bonecos de plastilina para a animación. A este labor dedicaron dous meses, nos que cortaron, pegaron e pintaron as distintas partes do decorado e modelaron as figuras de plastilina que darían corpo ós protagonistas da curtametraxe.
O traballo máis complicado foi darlles vida ós bonecos. Os rapaces aprenderon técnicas básicas de animación para dar expresión ás figuras, lograr sensación de movemento e facelas falar.
A montaxe fíxose en base a fotografías, que foron tratadas posteriormente. Para cada segundo de película foi necesario facer 25 fotos e para cada unha delas os rapaces debían mover os bonecos uns milímetros. Este arduo traballo tivo como resultado unha curtametraxe breve, pero de grande calidade e moi vistosa.
A directora do CPI Doutor Daniel Monxe, Dolores Vázquez, destacou a importancia do premio Crearte para o centro. «Hai que destacar o mérito deste traballo, porque os rapaces competían con estudantes de toda España de bacharelatos e ciclos formativos de imaxe e son». Valora tamén a dotación económica, de 23.000 euros, un dos premios máis cotizados do ámbito educativo.
Dolores Vázquez indicou que cando viu o resultado da montaxe soubo que «esta curtametraxe había que presentala a algún premio porque ten calidade».
En breve, a gravación poderá verse na páxina web do centro educativo, na dirección http://centros.edu.xunta.es/cpidoutordanielmonje.
