Un axente de policía que precedía en moto ao autobús do equipo alemán de fútbol Borussia Dortmund cando estalaron tres artefactos resultou afectado pola explosión, na que resultou tamén ferido o xogador español Marc Bartra, operado onte á noite dunha fractura no radio.
A policía informou nun comunicado do novo ferido, sen ofrecer máis detalles polo momento sobre a autoría do ataque, que presume que ía dirixido especificamente contra o equipo.
Bartra foi operado onte á noite nun hospital de Dortmund ao presentar fractura do radio á altura da boneca dereita e esquirlas na man, segundo as informacións facilitadas polo club.
As tres explosións rexistráronse ao redor das 19.15 hora local (17.15 GMT), cando o autobús do equipo, cos xogadores dentro, saía do seu hotel cara ao estadio para disputar a ida dos cuartos de final da liga de Campións fronte ao Mónaco, encontro que finalmente foi cancelado e aprazado a hoxe mércores.