Preto de vinte persoas participaron onte na primeira das visitas guiadas que ofrece a asociación de comerciantes Centro histórico pola parte antiga da cidade, que ofrecen aos turistas unha boa alternativa para coñecer a súa historia, así como as súas rúas e monumentos máis emblemáticos. A encargada de liderar a comitiva é Lucía Ferreiro, unha moza vivariense licenciada en Filoloxía Inglesa que dará as explicacións tamén en inglés cando participe nas visitas algún turista foráneo.
O punto de partida das visitas guiadas é sempre a Praza Maior, onde na primeira xornada acudiron numerosas familias e parellas, a maioría procedentes de Madrid pero tamén doutros puntos da xeografía española como Andalucía. Desta comunidade viña Encarna Augado, concretamente de Xerez, que quedou gratamente sorprendida coa cidade: «O percorrido resultou mellor do que me esperaba, pois se aprende máis desta forma que buscando por internet», dixo.
