Un incendio presuntamente provocado calcinou un vello alpendre en Soldón, unha aldea da parroquia da Seara situada na parte de montaña do Courel que pertence ao municipio de Quiroga. Os veciños están especialmente alarmados porque desde hai tres anos arderon varias construcións no pobo en similares circunstancias e hai dous anos queimáronse unha casa deshabitada e outro alpendre situados á beira do alpendre que foi pasto das chamas a madrugada de onte. De feito, ademais dos efectivos encargados de apagar o lume, ata Soldón desprazáronse onte membros da Garda Civil que fixeron varias pescudas e preguntas no pobo para determinar a orixe das chamas.
Aínda que as fontes oficiais evitaron facer manifestacións respecto diso, os residentes en Soldón están seguros de que o lume foi intencionado porque no alpendre, que levaba anos sen utilizarse, non hai ningunha instalación eléctrica que puidese ser o inicio do incendio.
Ademais, algúns veciños de Soldón non descartaron que o lume de onte e os que houbo fai un tempo noutros inmobles, pertencentes a diferentes veciños, poidan estar relacionados. «Non é a primeira vez que arde algo aquí, e todos sabemos como vai isto», apuntou un dos residentes no pobo.
O lume
Foi un veciño o que sobre as 9.30 horas da mañá de onte alertou aos servizos de urxencias do 112 de que había un inmoble en chamas en Soldón.
Desde a central desprazouse á zona a efectivos de Protección Civil de Quiroga e de Ribas de Sil que cando chegaron xa se atoparon o teito e as vigas moi afectadas no chan por efecto das chamas. «Cremos que o alpendre xa comezou a arder de noite e cando chegamos pouco máis poidemos facer que apagar o que quedaba do inmoble e refrescar a zona», apuntaron desde os servizos de Protección Civil.
