Un foro analiza as tendencias da arte do XIX e XX e os anticuarios galegos

A casa da cultura de Sarria, sita na Rúa Marqués de Ugena, acollerá o vindeiro xoves as segundas Xornadas de Anticuarios da Eurorrexión, nas que se analizarán a tradición das antigüidades, o papel dos profesionais do sector en Galicia e as tendencias da arte nos séculos XIX e XX.

Esta actividade, a cal se celebra con motivo da décimo oitava Feira de San Lázaro e segunda Feira de Antigüidades e Restauración da Eurorrexión, incluirá tres conferencias e un coloquio. As xornadas, abertas a todos os públicos, son organizadas polo Centro de Referencia de Antigüidades e Restauración (CRAR) de Sarria e contan coa colaboración do xornal El Progreso.