Os cinco membros da comisión organizadora da festa de San Cristóbal, en Riotorto, tiveron unha idea xenial para recadar fondos que lles está saíndo á perfección. Dividiron o campo de fútbol da localidade en 7.000 parcelas e a cada unha asignáronlle unha rifa.
O día 20 de maio soltarán unha vaca no campo de fútbol e esperarán a que solte a súa primeira deposición. O dono da rifa co número da parcela no que caia a boñiga da vaca levará nada menos que 3.000 euros. A estas rifas denomináronas 'A caca da vaca' e están a se converter en todo un fenómeno social en Riotorto e A Pontenova.
No caso de que a vaca non senta a chamada da natureza, haberá un sorteo ao uso "porque o premio vaise dar si ou si"
Sexa como sexa, o día 20 promete ser unha auténtica festa e así o expoñen os membros da comisión: Pablo, Generoso, Yago, Iván e David.
O primeiro deles, Pablo Pomar, conta que a idea lles xurdiu porque necesitaban conseguir diñeiro para a festa, así que con axuda dun topógrafo dividiron o campo de fútbol en parcelas idénticas: "Son cen metros de longo por setenta de ancho, así que é fácil, son sete mil parcelas. Démoslles un número e unha letra e a cada unha correspóndelle unha destas rifas".
O éxito da proposta foi abafador e aínda que aínda non recolleron as que deixaron a vender nos bares, Pablo di que "coas que fomos vendendo nós por aí foinos moi ben, a verdade, vendéronse moitas".
Iso si, di que nalgúns casos era necesario explicar como é a mecánica "porque moita xente non o entendía e se non se aclaraban ben, ó mellor pensaban calquer outra cousa".
PROCEDEMENTO. Está xa todo calculado de face ao día 20. Soltarán a vaca ás sete da tarde e en principio estará solta ata as dez da noite. No caso de que non senta a chamada da natureza, haberá un sorteo ao uso "porque o premio vaise dar si ou si", aclara Pablo Pomar, que di que logo haberá un prazo de trinta días para reclamar o premio, no caso de que o propietario da rifa non estea presente.
"Aínda que esperamos que veña xente, porque poñeremos un bar para recadar fondos e haberá música cun picadiscos", comenta, á vez que recoñece ser consciente de que "moita xente comprou a rifa sen ser de Riotorto, ou ese día estará fóra e non vai poder vir, así que poden estar tranquilos porque levarán igual o premio".