Un bruxo entre fogóns

a ningúen lle sorprendeu velo interpretar ao Bruxo da primeira Festa da Queimada de Cervo. Porque Fernando Blas ‘Nando’ é un auténtico meigo. A súa maxia ferve nos fogóns da Pousada O Almacén que el mesmo remodelou, convertendo a casa de comidas dos seus pais, Isabel e Rafael, no primeiro establecemento de turismo rural de Galicia. O seu carisma derivou de forma natural nun líder real, un home que levou ao límite a palabra asociacionismo. Os primeiros pasos da asociación cultural Airiños do Xunco, da Festa da Queimada ou da Sociedade Deportiva Cervo-Sargadelos levan o seu nome. Promotor do Club Balonmán Costa Lucense, presidente da Tuna de Santiago, nomeado Queimador Maior de Galicia… este gaiteiro diplomado en Maxisterio sempre ten algunha idea paseando polo seu privilexiado maxín. Hoxe en día, Nando agóchase entre as paredes da cociña do Almacén, onde goza como un neno, especialmente preparando pratos de caza. E aínda que non se lle ve, a súa presenza nótase a cada bocado. Nando ten o aspecto e a forza dun guerreiro celta que permanece na reserva, agardando a batalla, coas únicas armas da intelixencia, a iniciativa e o altruísmo.