As dimensións que alcanzou o Resurrection Fest, que ten a maquinaria en marcha para a súa novena edición, son palpables en cada anuncio que fan os organizadores e onte, día no que deron os nomes de 35 novos grupos, as redes sociais botaban fume, sobre todo ao desvelar que estarán en Viveiro bandas como Turbonegro, Testament, Down ou Gojira.
A emoción non terminou, nin moito menos, xa que na lista que deron a coñecer onte non había ningunha cabeza de cartel que acompañe a NOFX. Os organizadores avanzan que pronto desvelarán outros dous nomes estelares e 22 bandas máis, que, sumadas ás 11 que anunciaran con anterioridade, suman un total de 70 grupos para o festival que se celebrará en Viveiro o 31 de xullo e o 1 e 2 de agosto.
