Tito Díaz, técnico do Leyma: "Temos a obriga e o dereito de soñar"

Tito Díaz, técnico do Leyma Coruña, destacou que non esperaba un quinto partido con tanta superioridade e achacou a diferenza á intensidade e ao ritmo dos seus xogadores.

"Non esperaba isto. Confiaba no meu equipo. Estabamos convencidos de que podiamos gañar e esperaba un bo partido do meu equipo. Non tanta diferenza de ritmo e de intensidade. O Breogán, cando se viu quince ou vinte puntos por debaixo non tivo forzas para remontar como fixemos nós en Lugo. Gañou a nosa enerxía, na segunda metade estivemos máis frescos e con mais ritmo", valorou o preparador do conxunto herculino.

Díaz desfíxose en eloxios aos seus xogadores e manifestou que puxeron todo o seu corazón para gañar ao Breogán. "O que non se enganche na Coruña ao baloncesto non o fará na vida. Fixemos un esforzo extraordinario. Foi o terceiro partido que xogamos en cinco días e a exhibición de ritmo e de gañas foi total. Este clube nunca estivo nunha semifinal e os xogadores puxérono todo".

"Aquí hai xogadores que foron crecendo co equipo e eu, o que estou tratando de facer desde que cheguei aquí, é facer crecer o baloncesto na Coruña", indicou o preparador do cadro coruñés.

Díaz estableceu que o seu equipo ten o dereito e o deber de soñar con alcanzar a final e eliminar o Melilla. "Temos o dereito e a obriga de soñar. Temos que recuperarnos o mellor posible. Se temos que tombar un grande agora xogamos contra outro grande, pero o meu equipo cre no que fai e a fe move montañas. Hai que confiar neste equipo".