viernes. 26.02.2021 |
El tiempo
viernes. 26.02.2021
El tiempo

Texto íntegro da declaración da Comisión Internacional de Verificación


O portavoz da denominada Comisión Internacional de Verificación, Ram Manikkalingam, leu hoxe en Bilbao unha declaración na que se anuncia que ETA deixa "fóra de uso" parte do seu arsenal e cuxa transcrición íntegra é a seguinte:

"A Comisión Internacional de Verificación (CIV) constituíuse o 28 de setembro de 2011 para verificar o cesamento do fogo permanente, xeral e verificable declarado por ETA o 10 de xaneiro de 2011, e a subseguinte declaración de final definitivo da violencia do 20 de outubro de 2011.

Desde que se constituíu a Comisión, verificou que ETA cumpriu co seu compromiso de cesar todo tipo de asasinatos, atentados, ameazas e extorsións.

Ao longo deste período, traballou estreitamente cos actores políticos e sociais e vascos, entre eles o Goberno Vasco, partidos políticos, sindicatos, Confebask e representantes da Igrexa.

A CIV agradece a súa axuda e apoio na tarefa de verificar o alto o lume e o final definitivo da violencia.

Durante a última visita da Comisión en febreiro de 2013, a CIV constatou os avances positivos no País Vasco e manifestou o seu desexo de que se intensificasen os esforzos para consolidar a fin da violencia.

Por iso, animou a todos os actores a dar novos pasos e a adoptar medidas que incrementasen a confianza.

En abril de 2013, solicitou de xeito confidencial á CIV que incluíse no seu mandato a verificación dun proceso unilateral de selado e posta fóra de uso operativo das armas, munición e explosivos de ETA. A Comisión aceptou dita solicitude.

En setembro de 2013, ETA transmitiu á CIV que estaba disposta a dar o primeiro paso neste proceso, que tivo lugar en xaneiro de 2014 en presenza da Comisión.

A Comisión verificou que ETA selou e puxo fóra de uso operativo unha cantidade determinada de armas, munición e explosivos, o cal foi gravado en vídeo.

Achégase un detallado inventario de armas, munición e explosivos postos fóra de uso operativo.

A Comisión ten a confianza de que este paso é crible e significativo. Cremos que isto conducirá á posta fóra de uso operativo de todas as armas, munición e explosivos de ETA .

Desde a nosa experiencia, noutros procesos, a elaboración dun inventario e a posta fóra de uso operativo de armas, munición e explosivos é un paso necesario previo ao desarmamento completo.

Temos a esperanza de que isto pode conseguirse co apoio de todos os actores políticos e sociais. A Comisión seguirá traballando con determinación e imparcialidade en aras dunha paz duradeira".

Texto íntegro da declaración da Comisión Internacional de Verificación
comentarios