Ao redor de 30.000 nenos galegos, de seis a dezaseis anos, non poden xogar ao fútbol neste momento, ao decidir a federación galega suspender todas as competicións de todas as categorías inferiores á xuvenil por non ter seguro.
A decisión foi anunciada na tarde deste domingo pola Federación Galega de Fútbol, de forma cautelar. Segundo o comunicado emitido polo ente, o motivo é a "exclusión da modalidade do fútbol da prórroga do seguro deportivo do programa Xogade por parte da Secretaría Xeral do Deporte".
A medida afecta a todas as categorías inferiores á xuvenil, é dicir, cadete, infantil, alevín, benjamín e prebenjamín, que abarca a nenos de seis a dezaseis anos. Afecta tanto á competición como aos adestramentos.
O programa Xogade contén para os nenos que participan na actividade deportiva federada un seguro deportivo de accidentes que cobre a asistencia os centros concertados ao longo da tempada de vixencia da súa licenza federativa.
ESTE LUNS, REUNIÓN
A Secretaría Xeral para ou Deporte anunciou pola noite que este mesmo luns o seu titular, Xosé Ramón Lete Lasa, reunirase co presidente da federación, José García Liñares, "para garantir a cobertura da actividade e o desenvolvemento da competición".
Xosé Ramón Lete, foi informado os medios do anuncio federativo. En declaracións á Radio Galega, o dirixente político cuantificou nuns 30.000 nenos os afectados.
O secretario xeral indicou que o problema é que o seguro de competición para o fútbol é moi caro, porque se trata da actividade deportiva "que ten máis partes de baixa". Iso levou o ano pasado a que o seguro se disparase de 200.000 euros a 800.000, explicou. Por iso, a Xunta propuxo que fose a federación a que se fixese cargo do seguro, negociándoo conxuntamente co da alta competición. O Goberno galego anunciaba unha subvención con este fin de 300.000 euros, "dez euros por neno".
Lete Lasa mostrouse "sorprendido" porque deu a entender que había un acordo neste sentido. E deslizou unha crítica aos dirixentes federativos, porque emitiron o comunicado "sen previo aviso" e "sen falar antes". Ademais, recordoulles que Galicia é a única comunidade onde o Goberno autonómico asume o seguro.
Con todo, fixo un chamamento á tranquilidade e recoñeceu que non tiña o teléfono móbil do presidente da federación.
