O portal de poxas online Catawiki poxou por 39.500 euros o Mercedes-Benz 450 SEL blindado que utilizaba o Rei Juan Carlos I e a Familia Real nos actos oficiais a finais dos anos 70, durante os primeiros anos da Monarquía en España.
O vehículo foi adxudicado a un madrileño e a súa autenticidade está certificada pola propia Casa Real, que nos anos 70 comprou un grupo de Mercedes iguais dos cales tan só se coñece a existencia do que agora foi poxado. "En moi poucas ocasións tense a oportunidade de acceder ou comprar obxectos e pertenzas dunha Familia Real. Esa situación de excepcionalidade fixo que a poxa deste coche esperte moitísimo interese", comentou Alejandro Sánchez, director xeral de Catawiki en España e Portugal, en declaracións recollidas por Europa Press.
UNHA AUTÉNTICA XOIA. Este Mercedes-Benz 450 SEL de 39 anos de idade é de cor azul e mide cinco metros de longo, ademais de estar completamente blindado, posto que a finais dos anos 70 a súa misión foi a de protexer aos Reis. Esa blindaxe fai que este vehículo pese 2.230 quilogramos.
A pesar dos anos que pasaron, o vehículo está en perfecto estado e é totalmente funcional. Tamén conserva moitos dos seus detalles orixinais, como o teito corredero sobre as prazas traseiras a través do cal se asomaban os monarcas para saudar á poboación, así como a sirena acústica, as bandeiras e os portabandera.
Do mesmo xeito, o coche foi recentemente matriculado como Vehículo Histórico de España, xa que durante os seus primeiros anos de circulación levaba placas co símbolo da coroa en lugar dunha matrícula.
Poxado por case 40.000 euros o Mercedes do monarca emérito
O vehículo foi adxudicado a un madrileño ► O monarca emérito utilizábao nos anos 70 nos actos oficiais