O senegalés Ismael Aboiei, de 34 anos de idade, e o ribadense Marco Antonio Dourado, de 39, que traballa como vixiante de seguridade nun coñecido comercio local, fóronse onte a comer xuntos, para estreitar os lazos da súa nova amizade. «Non nos coñeciamos de nada, pero agora somos como amigos», sinalaba o mariñán, que agradece «enormemente» que o inmigrante o salvase de sufrir lesións graves» como consecuencia da malleira que lle propinaron outros cinco homes.
O incidente sucedeu no mes de outubro e, aínda que Dourado recoñece cometer aquel día un erro ao dirixirse a un coñecido, pareceulle «excesivo» que cargasen contra el cinco persoas.
