Seis persoas foron detidas acusadas de tráfico de drogas nunha ampla operación que se saldou, polo momento, coa desarticulación de tres puntos de venda na provincia e a incautación de armas, informou este luns a Delegación do Goberno.
As drogas e obxectos comisados foron postos a disposición do Xulgado de instrución número un do Carballiño, que determinou o ingreso en prisión dos tres detidos. Segundo a Garda Civil, esta operación bautizada Imperio comezou o pasado venres ante indicios de tráfico de drogas na provincia.
A Garda Civil considera desarticulados tres puntos de venda a pequena e mediana escala de drogas situados nas localidades do Carballiño, Xinzo de Limia e A Gudiña.
Os detidos son seis persoas con idades comprendidas entre 27 e 51 anos, identificadas coas iniciais J.V.B (51 anos) veciño A Gudiña; D.B.C. (33) de Barbadás; E.C.G. (27) e S.V.V.M. (33 anos), do Carballiño, e J.F.R.A. (43), tamén residente no Carballiño, e R.O.G. (41) da Mezquita.
Segundo fontes oficiais, os axentes incautaron nos catro rexistros domiciliarios 9,1 quilogramos de marihuana e 1,5 quilogramos de haxix así como pequenas cantidades de cocaína e heroína, cun valor no mercado clandestino duns 30.000 euros, ademais de catro básculas de precisión.
Así mesmo, os axentes incautaron un revólver e abundante munición, ademais de dous vehículos e unha importante cantidade de diñeiro. As citadas fontes sinalaron que a operación "continúa aberta" e que os axentes non descartan novas detencións nas próximas horas.
Seis detenidos en Ourense en una amplia operación contra el tráfico de drogas
Desarticuláronse tres puntos de venda na provincia e incautáronse armas, segundo a Delegación do Goberno