Tecnoloxía e tradición, o novo e o de sempre. Esta simbiose debe percibirse en moitos aspectos da vida cotiá e na maioría dos universos laborais. Con todo, é no sector agrogandeiro onde, quizais, a necesidade de conjuntar ambos os elementos de xeito exacto antóllase máis necesario.
Os que conviven todos os días entre cisternas, fosas para o xurro e respiran cada mañá o curiosamente húmido aroma da herba seca están cansados de coñecer estes datos, pero desde o andel do supermercado moitas veces un non chega sequera a exporse canto come unha vaca ao día ou se máis produción significa necesariamente máis rendemento.
«É impresionante a cantidade de cousas que se descoñecen e que se poden chegar a aprender», dicía onte a delegada territorial da Xunta, Raquel Arias, durante a súa visita ás instalacións da explotación agrícola Casa de Polo, en Barreiros.