As rúas de Sarria ambientáronse onte para despedir o verán cunha das súas festas máis emblemáticas, a Noite Meiga. A celebración, que conmemorou a súa 43ª edición, foi aberta oficialmente co pregón do xornalista e escritor sarrián Manuel López Poy, aínda que xa desde a noite do venres a vila vive esta festa.
Para Poy este evento é unha icona e, dixo, forma parte da «triloxía» das festas de verán de Sarria, nas que se inclúe o San Xoán, a Noite Meiga e a romaría dos Remedios. O escritor recordou que nunca formou parte da asociación cultural Meigas e Trasgos -promotora desta celebración-, aínda que si o seu irmán. O que si viviu foi a Noite Meiga, unha festa que agora se está recuperando, apuntou o sarrián, para quen esta é a primeira vez que fala en público en Sarria.
Os actos acaban hoxe coa Festa da Empanada
O programa de actos da Noite Meiga finaliza hoxe coa celebración da Festa da Empanada, que está organizada pola asociación gastronómica O Porco Cebado.
A festa terá lugar ao mediodía na sede de Meigas e Trasgos. O menú estará composto por empanadas típicas, embutidos da comarca e queixos de Sarria.
