Sarria e Kanonji únense para publicitar os seus propios camiños

Unha delegación da cidade xaponesa visitou a vila para coñecer a ruta e levar a cabo un intercambio cultural
La delegación japonesa y el presidente de la Asociación de Amigos do Camiño da Comarca, en Sarria.
photo_camera La delegación japonesa y el presidente de la Asociación de Amigos do Camiño da Comarca, en Sarria.

Unha delegación da cidade xaponesa de Kanonji visitou o venres Sarria co obxectivo de promocionar as dúas localidades e os seus respectivos camiños.

A comitiva nipoa estivo encabezada polo presidente da Asociación de Amigos do Camiño de Shikoku Henro, Matsuoka Hirofumi. Este considera que Sarria é un dos lugares máis relevantes da ruta xacobea, do mesmo xeito que Kanonji o é do Camiño de Shikoku. Ante esta similitude aposta por que leve a cabo un intercambio cultural entre as dúas localidades e promociónense mutuamente.

Segundo explicou Matsuoka Hirofumi, Kanonji está situada nos últimos 135 quilómetros do Camiño de Shikoku. "É unha cidade moi mística, hai unha enerxía moi grande", sinalou o responsable do colectivo.

1.200 KILÓMETROS. A ruta, que é moi similar á de Santiago, ten unha lonxitude de 1.200 quilómetros e conta con 88 templos. Dispón das súas propias credenciais, que selan os monxes en cada templo. Os peregrinos teñen unha vestimenta tradicional, composta por unha chaqueta branca, un pano no pescozo e un bastón. "No Camiño fas o voto de que es un peregrino para atoparche a ti mesmo", apuntou Matsuoka Hirofumi.

Este xa estivera en Sarria en varias ocasións, a primeira en 2009. O seu obxectivo é viaxar con mozos desde Xapón para darlles a coñecer o Camiño Francés.

Para levar a cabo o intercambio entre as dúas cidades, a comitiva mantivo unha reunión coa alcaldesa, Pilar López, e a concelleira de turismo, Marisa López. Os nipóns aproveitaron a súa estancia en Sarria para visitar as igrexas de San Salvador e Santa Mariña e a Rúa Maior da man do presidente da Asociación de Amigos do Camiño de Santiago da Comarca de Sarria, Jorge López.

Previamente a delegación -composta por profesores, historiadores ou empresarios- estivo en Compostela para entrevistarse co xerente do Xacobeo, Rafael Sánchez. Continuará este sábado a súa visita polo Camiño co fin de coñecer un pouco máis a experiencia de leste e aplicala na súa ruta. Parte da comitiva desprazarase a Molinaseca e o resto a Fisterra.

comentarios