A Consellería de Sanidade sostén que a apertura da sala de hemodinámica do Hospital Universitario Lucus Augusti (Hula), en decembro de 2013, evitou o 90 por cento dos traslados de pacientes con infartos ou anginas a outras provincias e asegura que a dotación futura de alta tecnoloxía para este hospital, en proceso de adxudicación, evitará tamén o traslado doutros pacientes, como os enfermos de cancro.
Así o sinalou este xoves o director xeral de Asistencia Sanitaria do Sergas, Félix Rubial, que compareceu na Comisión de Sanidade para responder a unha pregunta presentada pola deputada de AGE Eva Solla en relación ás condicións sanitarias dos pacientes de cancro e con cardiopatías isquémicas na provincia de Lugo.
Na súa intervención, Eva Solla cualificou de insuficientes "" os servizos cos que estes pacientes contan no Hospital Lucus Augusti, que non dispón aínda de servizos de alta tecnoloxía e cuxa salga de hemodinámica está activa "con horarios e días limitados".
Eva Solla referiuse a unha comunicación da Sociedade Española de Cardiología, que alertou recentemente de que "a mortalidade por infarto en Lugo dobra á de áreas como A Coruña, Santiago ou Vigo", que "dispoñen de unidade de hemodinámica".
Ao mesmo tempo, criticou que "miles de persoas" desta provincia teñan que ser trasladadas a outros hospitais para someterse a tratamentos de cateterismo ou a terapias contra o cancro, o que supón risco para a súa vida e un "elevado custo" para a Administración". Por iso, Solla preguntou ao director xeral achega do número de pacientes que teñen que ser trasladados a hospitais doutras provincias por este motivo, así como os falecementos producidos durante o traslado.
UN FALECIDO NUN TRASLADO
Na súa resposta, Félix Rubial explicou que no ano 2011 foron 1.164 os pacientes con cardiopatía isquémica trasladados a hospitais doutra provincia desde Lugo, mentres que en 2012 foron 1.159 e en 2013 ascenderon ata os 1.304, dos que 206 proviñan da área norte de Lugo, 880 da área centro e 218 da área sur.
Durante o traslado, engadiu, en 2011 faleceu un paciente afectado por estas patoloxías, en 2012 faleceron tres pacientes e en 2013 faleceu un paciente.
En canto aos pacientes con cancro trasladados para recibir un tratamento de radioterapia desde Lugo a outras provincias, en 2011 foron 662, en 2012 foron 715 e en 2013 foron 705, dos que 161 proviñan da zona norte, 512 da zona centro e 32 da zona sur.
Con todo, Félix Rubial sinalou que a apertura da sala de hemodinámica do HULA mellorou a situación" e está "a evitar" o 90 por cento dos traslados de pacientes con cardiopatía isquémica. En canto aos enfermos de cancro, o director xeral recordou que Sanidade está "inmersa" nun proceso de adxudicación de alta tecnoloxía que "dotará ao HULA de infraestruturas necesarias para evitar estes traslados".
Finalmente, Félix Rubial rexeitou os datos que apuntan que a taxa de mortalidade por infartos en Lugo sexa máis elevada que noutras provincias e sinalou que, se se adaptan estas estatísticas á distribución por idades, "as taxas de mortalidade estandarizadas son incluso inferiores" á media.
