Sae de prisión o empresario que insultou á xuíza da Pokemon

A Audiencia Provincial de Lugo estimou un recurso de apelación formulado pola defensa do empresario Miguel G.G., o imputado na Operación Pokemon que foi encarcerado o 30 de agosto por ameazar supostamente á xuíza instrutora, ao crer que os feitos carecen "de gravidade suficiente" para dar lugar a esa medida cautelar.

Nun auto de 18 de setembro, o relator desta resolución recoñece que os feitos polos que foi detido o empresario son "constitutivos de infracción penal", pero carecen da "entidade ou gravidade suficiente" para dar lugar "á situación de prisión".

De feito, aclara que o detido, no que se refire á xuíza Pilar de Lara, só expresou "reproches" pola "súa actuación xurisdiccional" e foi con terceiros "alleos", neste caso cos avogados que acompañaban á maxistrada, cos que houbo enfrontamento físico".

Por outra banda, entende que "resulta patente que o imputado non está en condicións de variar ou alterar o curso da investigación" en curso e tampouco "existe dato algún" sobre "a posible pretensión" pola súa banda de eludir "a acción da xustiza".

De feito, recorda que "nun dos momentos do conflito", cando intentou evitar que "a súa nai seguise coa súa acción virulenta", fixo alusión "a que a situación se debía resolver nos tribunais", o que leva "á conclusión de que no ánimo do imputado non está o eludir aos tribunais senón, ao contrario, solucionar a controversia en tal vía xudicial".

Ademais, a Audiencia Provincial afirma que "o que parecía ser unha acción con pretensións violentas por parte do imputado", cando pediu un coitelo no local no que se atopou coa xuíza, "non eran talles", pois o reclamou supostamente para "pór fin á súa vida".

Para rematar, a sala considera que a posibilidade de que se produzan feitos similares no futuro "pódese ver conxurada co establecemento dunha medida de afastamento", similar á que se lle impuxo no seu día á nai do empresario, que tamén foi imputada por mor destes acontecementos.

De feito, o auto da Audiencia indica que o propio Miguel G.G "en ocasións pretendeu tranquilizar a situación", ao ver "á súa nai enfrascada nunha sarta de reproches" facía a propia maxistrada.

Por iso, entende que "non está xustificada nin procesual nin constitucionalmente" a "máis grave das medidas cautelares", neste caso "a prisión provisional".

De todos os xeitos, imponlle ao imputado a obrigación de comparecer cada quince días no xulgado e prohíbelle "manter contacto de ningún tipo, nin directo nin indirecto, nin verbal, nin virtual, nin en forma algunha" coa xuíza instrutora.

Miguel G.G. foi enviado a prisión o pasado 30 de agosto, logo de prestar declaración, pola titular do Xulgado de Instrución Número 2 de Lugo, Sandra Piñeiro, que estaba de Garda nesa data.