O Concello de Sada demandou este venres á Xunta a incoación dun novo expediente sancionador á familia Franco ante a "cancelación unilateral" pola Fundación Nacional Francisco Franco das visitas ao Pazo de Meirás, feita pública na súa páxina web e aludindo motivos de seguridade.
"O que hai que cancelar dunha vez é a vergoña do Pazo retido polos Franco. Nin un minuto máis de aguantar a burla do Franco á cidadanía galega. Non máis pasividade cómplice da Xunta", declarou Benito Portela, alcalde desta localidade coruñesa na que se sitúa o inmoble, declarado Ben de Interese Cultural.
Segundo manifestou nun comunicado, "non se pode tolerar que a Fundación Francisco Franco use o Pazo de Meirás para difundir o legado do ditador e asasino Francisco Franco, e desde logo tampouco se pode tolerar que dita Fundación cancele ao seu antollo o réxime de visitas estipulado na normativa legal vixente".
O Concello de Sada mostrou a súa disposición á Xunta para asumir o réxime de visitas ao Pazo de Meirás.
PPDEG. Pola súa banda, o secretario xeral do PPdeG, Miguel Tellado, manifestou este venres que el "persoalmente" ve a Fundación Franco "un anacronismo histórico" e defendeu que "o mellor que podería facer é disolverse", xa que "non ten razón de ser nunha sociedade madura" como a española.
Manifestouno, en rolda de prensa, ao ser preguntado sobre a decisión da Fundación de cancelar as visitas ao Pazo de Meirás "por motivos de seguridade", unha cuestión sobre a que Tellado remitiu ao pronunciamiento da Consellería de Cultura, que é "á que toca avaliar" se este argumento está "xustificado".
"Remítome ao que poida dicir a Consellería; non gobernamos desde a sede do partido, goberna a Xunta", esgrimiu, un día despois de que o seu xefe de filas e presidente galego, Alberto Núñez Feijóo, pedise á familia do ditador que, se non asume a lei que a obriga a autorizar visitas ao Pazo, o onde ao patrimonio público autonómico.
Na mesma liña, Tellado subliñou que o PPdeG non cambiou de postura e que desexaría que a familia Franco "abrise reflexión sobre a necesidade de que o Pazo de Meirás fose de titularidade pública".
Pola contra, avogou por buscar "mecanismos legais" que permitan que sexa a Administración "a que se faga coa titularidade dun pazo do que todo o mundo coñece a historia".
Iso si, advertiu que aos populares non se lles pode pedir "converter Galicia na Arxentina dos Kirchner". "As expropiacións están moi ben nos discursos dalgúns, pero hai que buscar os mecanismos legais que permitan que o pazo sexa de titularidade pública", resolveu.
