A lucense María Reimóndez, escritora, tradutora e cooperante, está volcada na causa feminista
1. ¿Qué o que máis e o que menos lle gusta do seu traballo?
O que máis me gusta do meu traballo de intérprete é a aprendizaxe constante e a relación con xentes moi diversas. O que menos, acudir a actos protocolarios.
2. Se volvese empezar, dedicaríase a...
Exactamente ao mesmo.
3. ¿Estraña algo do que foi deixando atrás?
Ás persoas que xa non están
4. ¿A quen admira?
A calquera muller que se arrepón a un sistema que nos educa para a submisión.
5. ¿Que cita subscribiría?
A de Rebecca West: «Chámanme feminista cada vez que expreso calquera idea que me diferencia dun felpudo», e tamén un dito támil: «Unha man soa non fai música».
6. ¿Votou nas últimas eleccións?, ¿atrévese a dicir a quen?
Non votar paréceme sempre unha irresponsabilidade e, como muller e co traballo que custou conseguir o voto, pois aínda máis. No canto de dicir a quen votei, prefiro dicir a quen non votei nunca nin votarei: nin ao PP, nin ao PSOE nin a UPyD.
7. ¿Que coche ten?
Non teño coche, son activista do transporte público.
8. ¿Cal foi o antollo máis caro que mercou?
Unha cámara de fotos réflex.
9. ¿E o seu ben material máis prezado?
Unha almofada de viscolátex de viaxe que me regalou miña nai e grazas á cal deixei de ter tremendas contracturas.
10. Unha toleada que fixera por amor...
Non creo no amor ese polo que se fan supostas toleadas. O mellor sería desbotalo e comezar de novo a pensar nos afectos.
11. ¿Que libro ten na mesiña de noite?
Neste momento ando metida no ‘Fish-hair woman’, de Merlinda Bobis.
12. Non sae da casa sen...
Lavar os dentes e sen as chaves.
13. ¿Que pecados capitais desculpa?
Non creo nos pecados de ningún tipo.
14. ¿Que é o que nunca falta na súa neveira?
Queixo.
15. Pérdea un bo...
¡Chuletón!
16. Séntese cómoda vestida con...
Calquera cousa das que teño no armario. Vestir de xeito incómodo é unha forma de masoquismo que non practico.
17. Unha peza que deteste...
Calquera que estea feita con man de obra infantil, mediante a explotación de mulleres ou con contaminación extrema do medio. Dito doutro xeito, calquera peza do grupo Inditex ou de El Corte Inglés, por poñer dous casos máis que denunciados.
18. A paisaxe que máis a impresionou...
Os Ancares, porque aí están partes moi importantes da miña vida.
19. Un libro, unha película e un grupo musical.
A colección de poetas galegas e támiles Vanakkam-Benvidas, que tiven a fortuna de editar para Implicadas no Desenvolvemento; ‘Fire’, de Deepa Mehta, e de música quédome con Sés.
20. A súa materia pendente...
Aprender a editar videos.
1. ¿Como se viven, cando se funda unha ONG como Implicadas no Desenvolvemento, os escándalos de outras organizacións deste tipo?
Se hai ‘escándalos’ nalgunhas ONGs é porque non hai unha participación cidadá real nelas, porque a xente está contenta con dar uns cartos e ter a conciencia tranquila no canto de pensar nas cousas que realmente crean a pobreza e que teñen que ver cos nosos comportamentos cotiáns. A eso e a crear alianzas coas mulleres do sur dedicáse Implicadas.
2. Como feminista, ¿cando oíu a proposta de reforma de lei do aborto de Gallardón pensou que só se podía tratar dunha broma?
Para a dereita rancia española, co apoio dunha Igrexa retrógrada que aínda pensa que o seu espazo está no Goberno, o control dos corpos e da sexualidade das mulleres é un obxectivo fundamental.
3. ¿Cando deixarán de facer política a costa das mulleres?
Cando haxa conciencia de que a política facémola cada día e de que somos responsable do que facemos e de como nos relacionamos con quen temos ao lado.