A Consellería de Traballo e Benestar envioulle ao Concello ribadense, á primeira hora da mañá de onte, o permiso autonómico para que o ente municipal poida iniciar os trámites de construción do futuro xeriátrico público da localidade. Ao mediodía, o rexedor ribadense, o nacionalista Fernando Suárez, confirmou a recepción da demandada autorización, que permitirá licitar en breve as obras de edificación e xustificar, antes de que acabe o ano, máis dun millón de euros de axudas provinciais.
«O permiso de inicio das obras xa saíu dende as oficinas da Consellería cara ao Concello de Ribadeo, a primeira hora desta mañá», como lle comunicaron onte a este xornal os responsables do gabinete de comunicación do departamento autonómico, que dirixe Beatriz Mato. «Os expedientes vanse entregando segundo a orde de chegada», explicaron desde a Administración galega.
Haberá que esperar algo máis pola firma do convenio con Traballo e Benestar para que este achegue 500.000 euros de subvención para construír a residencia de anciáns de Ribadeo:
