O novo expediente de regulación temporal de emprego (Erte) que Cementos Cosmos quería negociar para os primeiros seis meses deste ano para a fábrica de Oural foi paralizado, sendo así a primeira vez desde 2013 que a planta sarriá non ten en aplicación unha medida deste tipo. Desta forma, desde o pasado día 1 os 15 operarios que quedan na fábrica e a canteira de Vilavella (Triacastela) traballan con normalidade, a xornada completa, segundo informou o comité de empresa.
A cementeira tivo en vigor un primeiro Erte no ano 2014 e aprobouse un novo para todo 2015, o cal tiña validez ata o pasado 31 de decembro.
Cosmos anunciara a súa intención de negociar un novo expediente de regulación temporal de emprego para os seis primeiros meses deste ano. Con todo, tras varias reunións, a firma e os obreiros acordaron que non se aplicaría, asegurou o comité.
Por iso, desde principios de ano todos os empregados atópanse traballando na fábrica a xornada completa, sinalou. Na actualidade a cementeira conta con 15 operarios: dez para a planta de Oural e outros cinco para a canteira de Vilavella (Triacastela). Cando non contan con traballo na explotación de calcaria, estes cinco obreiros trasládanse á fábrica.
MOER CEMENTO. Os empregados encárganse do mantemento e revisión de maquinaria e instalacións da planta sarriá, ademais de preparar material para a firma Calfensa e moer cemento. Este último labor lévana a cabo «un mes se e outro non», apuntou o comité de empresa.
Todos os operarios traballan de día (a xornada continua ou partida), excepto un, que o fai de noite e encárgase de vixiar a planta.
Os empregados están satisfeitos co resultado das reunións, xa que a paralización do Erte permite que todos traballen a xornada completa e evita que teñan que estar no paro dous dos seis meses como fixaba o novo expediente exposto pola empresa, asegurou. Con respecto ao futuro da fábrica, os traballadores atópanse á espera de ver como evoluciona o mercado.
A crise da cementeira sarriá comezou en 2012, cando tiña uns 90 operarios. Entón iniciáronse as negociacións do expediente de regulación de emprego (Ere) que terminaría aprobándose en 2013 e que levaría o despedimento dunha trintena de persoas e o traslado doutros traballadores á fábrica coa que conta o grupo na localidade leonesa de Toral dos Vaos.
Ao Ere houbo que sumar o primeiro Erte, que levou outras cinco extincións de contrato nas mesmas condicións do expediente de regulación de emprego aprobado un ano antes. Ademais, fixaba que os traballadores estarían un máximo de catro meses e medio no paro. Pola súa banda, o Erte aprobado para 2015 levou que os operarios tivesen que ir ao paro catro meses dos doce nos que tiña validez.
