A Xustiza belga decidiu na noite deste domingo deixar en liberdade baixo medidas cautelares o expresidente da Generalitat de Cataluña Carles Puigdemont e os seus catro exconsellers tras a audiencias celebradas na sede da Fiscalía de Bruxelas. Así o anunciou o avogado de Meritxell Serret e Toni Comín. Ademais, fontes do ministerio público indicaron en Bruxelas que a decisión xa foi comunicada aos detidos, que este domingo declararon durante unhas cinco horas, despois de ser arrestados á primeira hora ao entregarse á Policía Federal belga. A todos imponlles a obrigación de permanecer en Bélxica ata que se resolva a orde de detención.
O expresidente do Goberno rexional catalán Carles Puigdemont e os catro exconselleiros que o acompañan en Bruxelas entregáronse este domingo á Xustiza belga en calidade de detidos e rexeitaron o seu traslado ante as autoridades españolas que os reclaman por presuntos delitos de sedición, rebelión e malversación de fondos públicos. Todos declararon durante a tarde e atópanse esperando a resolución do xuíz.
Permanecen en "privación de liberdade" aínda que non están nun calabozo
Puigdemont e os exconselleiros autonómicos Antoni Comín (Saúde), Clara Ponsatí (Ensino), Lluís Puig (Cultura) e Meritxell Serret (Agricultura), entregáronse á Policía federal en Bruxelas ás 09.17 horas (08.17 GMT) do domingo, explicou en comparecencia de prensa o portavoz da Fiscalía de Bruxelas e maxistrado, Guilles Dejemeppe.
A entrega foi "convida" cos letrados dos cinco políticos cataláns, que respectaron o compromiso e se entregaron ás autoridades belgas en presenza dos seus avogados, precisou.
Produciuse nunha comisaría de Policía do centro de Bruxelas, evitando a presenza de medios de comunicación no momento no que pasaban a estar formalmente baixo arresto.
Pouco despois foron trasladados á sede da Fiscalía de Bruxelas, onde permanecen en "privación de liberdade", é dicir "sen liberdade de movementos" e obrigados a permanecer no edifico, aínda que non están nun calabozo, precisou o portavoz do Ministerio Público.
O medio centenar de profesionais dos medios de comunicación que agardaban a Puigdemont e os seus exconsellers rexionais no inmoble non os viron entrar, xa que o fixeron en coche e a través da porta con acceso subterráneo ao edificio.
A Fiscalía belga deberá agora designar a un xuíz de instrución, probablemente ao longo do domingo, segundo as mesmas fontes, que lles tomará declaración por separado a cada un deles e sempre antes das 09.17 horas de mañá.
En cada unha desas vistas estarán presentes os afectados, os seus avogados, o xuíz de instrución e un intérprete, pois elixiron que a comparecencia sexa en neerlandés, agregou Dejemeppe, quen precisou que o máis probable é que as audiencias conclúan na tarde noite deste domingo.
A tramitación en Bélxica das euroordes debería, teoricamente, prolongarse un máximo de 60 días, e 30 máis en circunstancias excepcionais
O que fose 130 presidente do Goberno da comunidade autónoma española de Cataluña está representado legalmente en Bélxica polo letrado flamenco experto en extradicións Paul Bekaert.
A continuación, o maxistrado deberá en cada caso dicir se acepta executar a Orde Europea de Detención e Entrega (OEDE).
No caso de que non a rexeite, o xuíz de instrución terá que decidir se ordena a súa liberación con condicións ou se lles impón prisión preventiva.
"O xuíz deberá decidir en 24 horas, é dicir, antes das 09.17 horas de mañá", dixo o portavoz da Fiscalía, quen precisou que, se o xuíz de instrución "considera que non debe liberalos, serán conducidos a prisión".
O proceso xudicial continuará na Cámara do Consello de Bruxelas, tribunal de instrución e primeira instancia xudicial, que disporá dun prazo de 15 días para pronunciarse sobre o recurso dos interesados.
A tramitación en Bélxica das eurordes debería, teoricamente, prolongarse un máximo de 60 días, e 30 máis en circunstancias excepcionais, recordou o portavoz do Ministerio Público nunha rolda de prensa en francés, inglés e neerlandés.
No entanto, o portavoz da Fiscalía matizou que, no caso de que non se ordene o seu ingreso en prisión, o prazo podería incluso alargarse máis dos citados 90 días.
É dicir, que nese caso Puigdemont non sería entregado a España antes do 21 de decembro, cando hai convocadas unhas eleccións autonómicas en Cataluña ás que pretende concorrer e para as que o seu partido, o PDeCAT, o propuxoe como cabeza de lista.
A contorna do político independentista en Bruxelas precisou aos medios de comunicación que a súa interpretación da situación xurídica de Puigdemont é que non está detido, senón "a disposición" das autoridades belgas, actitude que se enmarca na súa vontade de non subtraerse á acción da Xustiza, senón simplemente defenderse nun procedemento xusto e imparcial".