Preto de 400 persoas gozaron este mércores da comida de confraternidade que a comisión de festas de San Ramón e Santa María e o Concello de Vilalba promoven como eixo central da Xira da Terceira Idade.
Nunha carpa instalada na recentemente acondicionada explanada da piscina, na área recreativa da Magdalena, os asistentes saborearon un menú a base de entrantes, churrasco, sobremesa, bebida e café, servido por Casa Maragata.
Previamente celebrouse unha misa campestre cantada pola coral Luar e houbo sesión vermú a cargo da orquestra Los Supremos, que repetía no baile vespertino xunto ao dúo Pedriñas. Ademais, os grupos locais Pandereteiras de Andrade e Charanga de Vilalba amenizaron a xornada.
Os vilalbeses non fallaron a esta cita, que se intenta potenciar tras perder afluencia nos últimos anos, e acudiu unha ampla representación de practicamente todas as parroquias do municipio e tamén de colectivos locais, como a asociación de viúvas Carmiña Prieto Rouco, con preto de medio centenar de socias presentes. "Xa viñemos o ano pasado e a verdade é que esta é unha boa entrada nas festas, todo o que sexa divertirse está ben", dixeron desde a entidade.
Non foron as únicas con afluencia masiva, tal e como proban os preto de 60 comensais chegados desde Sarria. "Levamos toda a vida vindo, mantemos o costume de vir todos xuntos", explicou Elvira Morais, o presidente da asociación sarriá da terceira idade.
Con menor representación, pero co mesmo espírito de festa e ganas de "pasar un día todos xuntos", tamén acudiu un grupo de 14 amigos xubilados, procedentes de Ferrol, As Pontes, Rioaveso, Sancovade e Lanzós.
Eles e outros moitos non quixeron perderse unha festa de gran tradición, que non só se limitou á zona da carpa, xa que en toda a área recreativa deixouse sentir o efecto desta convocatoria, na que colaboraron a Garda Civil e Policía Local de Vilalba, así como Protección Civil e a Cruz Vermella.
"Estamos moi contentos co resultado", foi a valoración realizada tanto desde o Concello de Vilalba como desde a comisión de festas de San Ramón e Santa María, coa vista xa posta na próxima cita multitudinaria das patronais, a Xira da mocidade, que se celebrará no mesmo escenario este fin de semana. Estará amenizada polas orquestras Son D´Vigo e Zeltia, ademais da Charanga de Vilalba nas merendas do sábado 26, e polo grupo Fénix, o domingo 27.
