A XXIII Feira Agroalimentaria do Queixo e das Castañas da Ulloa, que se celebrará o domingo 26 no recinto feiral de Monterroso, foi presentada este martes na sede da Deputación de Lugo.
A vicepresidenta segunda do ente provincial, Lara Méndez, destacou que a Deputación contribúe á celebración desta cita, posto que "se enmarca na nosa aposta polo impulso dos produtos autóctonos e dos oficios artesanais, como sinais de identidade e atractivo da provincia que xeran riqueza, aproveitando a visita de centos de persoas nestas datas". O ano pasado, máis de 6.000 persoas se deron cita na feira, orixinalmente centrada no queixo da Ulloa.
Na presentación estiveron tanto o alcalde, Antonio Gato Soengas, como o primeiro tenente de alcalde, Antonio Rodríguez Guerra.
O recinto feiral de Monterroso abrirá ao público ás dez da mañá. Media hora máis tarde comezará o reparto de castañas asadas entre todos os visitantes e haberá tamén unha degustación de pinchos de queixo e tapas. Cara ao mediodía terá lugar a inauguración oficial da xornada, que este ano conta con dous pregoeiros: o actor e produtor galego de cine e televisión Rubén Riós, e o xefe de cociña do restaurante Galileo de Pereiro de Aguiar (Ourense), Flavio Morganti.
A mediodía, sobre a una e media, será a entrega de premios do concurso de tapas, que estará amenizado por un concerto da banda municipal. Pola tarde, a sesión musical continúa dende as cinco ata media tarde.
