Portos de Galicia chegou a un acordo con dous dos tres propietarios de concesións vixentes no peirao vello de Viveiro para o seu rescate e a derriba das naves. Un terceiro decidiu non asinar polo momento e agora ten un prazo de dez días para presentar alegacións.
A reunión celebrouse onte pola mañá no edificio de Portos no municipio, onde o responsable provincial do ente viuse primeiro cos propietarios dos dous galpóns que estiveron de acordo e a continuación co terceiro, titular da nave que está máis preto da casa do guardamuelles e que ten actividade náutica. Ao dono non lle convenceron as condicións e consulta co seu asesor as posibilidades, aínda que non se pecha a un acordo futuro. O contrato da súa concesión ten vixencia ata o ano 2022.
Desde Portos limitáronse a confirmar a reunión, na que presentaron aos titulares das naves a proposta económica e o contrato que asinarían para a caducidade das concesións. Apuntan que o tema quedou «bastante encamiñado» pero «non pechado» e que a intención é chegar a un acordo con todos.
Un dos concesionarios que si estivo de acordo apuntou a este diario que pola súa banda quedara «todo solucionado». A outra titular que aceptou declinou facer declaracións. As naves destes dous están na parte central do peirao e unha delas susténtase nun galpón xa baleiro que quedou sen demoler na anterior fase polo perigo de que caese.
A alcaldesa de Viveiro, María Loureiro, reúnese mañá en Santiago co presidente de Portos, José Juan Durán, para abordar este asunto e espera que a derriba se execute o máis axiña posible xa non só por estética, senón por seguridade. «Levamos dous anos solicitando a derriba dos galpóns e non quería que pasase outro inverno porque se están deteriorando», di a rexedora, que solicitou o encontro antes de coñecer que o ente público ultimaba o acordo cos concesionarios. «Non se se foi por mor de pedir eu a cita ou non, pero me alegro porque o primeiro é o interese dos veciños e xa vai sendo hora de que se tiren os galpóns», apunta.
Se todos os titulares estivesen de acordo a derriba acometeríase pronto, pois Portos xa ten o proxecto de demolición e humanización da chaira, na que se habilitarán aparcadoiros.
