A práctica de Kitesurf na praia barreirense de Altar está a xerar unha serie de problemas entre diferentes colectivos. Os veciños consideran a práctica de "risco para os bañistas", mentres que o club organizador asegura que o seu labor non supón ningún problema porque a desenvolven nun lugar especialmente acoutado para iso.
O presidente do club Augassantas, Óscar García, explicou que o club traballa co concello para habilitar unha zona da praia para este deporte. García afirmou que isto ademais non implica que se quitase a bandeira azul deste areal xa que a Adeac, que concede ditos distintivos de calidade aos areais, permite a práctica sempre que se realice en zonas específicas e sinalizadas.
PROTESTAS. Os veciños pola súa banda sinalan que esta modalidade deportiva "ocupa e molesta moito aos bañistas e incluso pode ser perigoso porque acadan grandes velocidades e as veces non os controlan".
Os veciños sinalaron que Adeac "obrigou o ano pasado ao Concello a emitir un bando no que se prohibía a práctica do deporte", pero como logo da comunicación non fixo nada máis "retiraron a bandeira".