A planta de biodiésel de Begonte agoniza cunha débeda de 17 millóns

O prometedor proxecto de Biocarburantes de Galicia SL que botaba a andar hai unha década truncouse. Esta empresa, que ten a súa planta de produción en Begonte -a única que hai na provincia de Lugo-, viuse abocada a presentar concurso de acredores ao acumular un pasivo que ascende a uns 17 millóns de euros. A liquidación é o seu previsible destino.

O xulgado mercantil de Lugo, que anunciaba este martes o procedemento, designou ao economista Jorge Bermúdez de Castro e Jaspe como administrador concursal desta sociedade chairega, cuxa marca comercial é Bgal.

Biocarburantes de Galicia SL foi constituída en xaneiro de 2006 por media ducia de investidores, entre os que figuraban entón varios futbolistas profesionais, por exemplo o exdefensa do Deportivo, Spórting de Xixón, CD Lugo e Rácing de Ferrol José Manuel Aira, que agora adestra ao Real Murcia de 2ª División B.

A súa planta de Begonte, considerada como un dos principais motores deste polígono industrial, non entraría en funcionamento ata un ano e medio despois cuns 14 traballadores. Estaba deseñada para producir unhas 35.000 toneladas anuais de combustible biodegradable a partir do tratamento de aceites vexetais como a soia, que adoitaba importar de Sudamérica.

UNHA FUXIDA CARA A ADIANTE. A dura competencia pola importación de biodiésel foille pasando factura a esta empresa, como ás outras do sector asentadas tanto en Galicia como en España. Hai tres anos parecía que conseguía reconducir a súa situación coa súa apertura a outros mercados europeos, como Francia e Italia, e coa súa aposta por reciclar os aceites usados de cociña. Pero acabou sendo un espellismo.

Os acredores terán agora que pór en coñecemento do administrador concursal os créditos contraídos por Biocarburantes de Galicia SL, para o que disporán dun mes de prazo, a contar desde o último anuncio do procedemento no rexistro público concursal.