Piden dous anos de cárcere para os pais de Nadia por exhibicionismo e pornografía infantil

A Fiscalía de Lleida pide dous anos de prisión para Margalida Garau e Fernando Blanco, os pais de Nadia, a nena á que presuntamente utilizaron para cometer unha estafa cos donativos que recadaban para sufragar supostos gastos sanitarios desta, polos delitos de exhibicionismo e pornografía infantil.

Segundo fontes xudiciais ás que tivo acceso Efe, durante a investigación do caso atopáronse 41 fotografías no computador dos pais nas que estes mantiñan relacións sexuais na mesma cama que a nena, que tiña once anos de idade cando o caso se destapou a finais do pasado ano. Paralelamente, acháronse 15 imaxes da menor espida e con "actitudes impropias" para a súa idade.

Ademais das penas pedidas por ambos os delitos, Fiscalía propón a prohibición para cada un dos pais de ver á nena durante cinco anos por cada un destes dous delitos, é dicir dez anos en total para cada un dos proxenitores.

Contra os pais de Nadia, que residían en Fígols i Alinyà (Lleida), xa hai outra causa aberta por un presunto delito de estafa polo que o pai está en prisión preventiva sen fianza ata que se celebre o xuízo, e a nai, que se atopa en liberdade, perdeu a patria potestade da pequena.

Os pais iniciaron varias campañas para recadar fondos para sufragar os gastos e investigar sobre a suposta enfermidade rara que sufría Nadia. Segundo a acusación, os pais da menor, que se investiga se realmente sufría unha enfermidade rara, gastaron en fins particulares alleos ao tratamento de Nadia polo menos 600.000 dos 918.000 euros que recadaron en donativos para a nena desde 2008. Actualmente, Nadia reside en Mallorca coa súa tía materna.