Pence abandona un estadio pola protesta racial de varios xogadores

O vicepresidente de Estados Unidos, Mike Pence, abandonou este domingo o estadio no que estaba a ver un partido da liga de Fútbol Americano (NFL, en inglés) despois de que varios xogadores protestasen axeonllándose durante a interpretación do himno nacional. Pence explicou a súa decisión de marcharse do partido que disputaban en Indianápolis o equipo local dos Colts fronte aos San Francisco 49ers nun comunicado divulgado pola súa oficina e en Twitter. "O presidente (Donald) Trump e eu non dignificaremos ningún evento que falte ao respecto aos nosos soldados, á nosa bandeira ou ao noso himno nacional", advertiu Pence.

"Aínda que todo o mundo ten dereito ás súas propias opinións, non creo que sexa moito pedir aos xogadores da NFL que respecten a bandeira e o noso himno nacional", sostivo o vicepresidente.

Varios xogadores dos San Francisco 49ers axeonlláronse mentres soaba o himno, en liña con protestas similares que se viviron en partidos da NFL desde hai semanas. Todos eses xestos producíronse en rexeitamento a uns comentarios de Trump, que instou os donos dos equipos a despedir aos xogadores críticos que protesten pola violencia policial contra os afroamericanos colocando un xeonllo en terra ou entrelazando os seus brazos durante a interpretación do himno.

O presidente insistiu en que esas protestas non teñen nada que ver co racismo e acusou aos xogadores e equipos que as secundan de falta de patriotismo e de respecto pola bandeira. Na súa conta de Twitter, Trump asegurou este domingo que foi el quen pediu a Pence que abandonase o estadio "se algún dos xogadores se axeonllaba, desprezando" ao país.

A continuación, o mandatario declarouse "orgulloso" do xesto realizado polo vicepresidente e a súa esposa, Karen Pence.