A perruqueira María Janeiro traballa por encargo nos fogares dos seus clientes, residentes en distintas zonas do medio rural. A maioría dos seus usuarios ten problemas para desprazarse pola súa idade ou estado de saúde
O custo dun servizo de barbería a domicilio adoita ser, case sempre, un luxo polo seu elevado prezo, pero a formulación de María Janeiro non coincide con esta idea. Esta perruqueira desprázase por distintas zonas do medio rural da provincia de Lugo para atender a persoas que, polo xeral, viven en zonas illadas e, en moitos casos, son de idade avanzada.
A iniciativa de María de moverse en función das necesidades dos seus clientes comezou hai catro anos, a pesar de que leva máis de 18 dedicándose á barbería. «Traballei varios anos en Lugo e logo en Castroverde, pero deixeino cando quedei embarazada porque tinga que coidar do meu fillo», recorda. Durante un par de anos dedicouse a atender a súa casa ata que lle ofreceron traballar periodicamente nos centros sociais das parroquias lucenses de Calde e Bóveda, onde naceu, nos que se ofertaban diversos servizos para a xente da zona, entre eles o de barbería.
