O secretario xeral do PSOE, Pedro Sánchez, considera que as expresións do bispo de Alcalá de Henares, Juan Antonio Reig Plá, sobre a retirada da reforma da lei do aborto son unha nova mostra do "seu sectarismo" e asegura que "a ninguén pode beneficialo tanto odio".
"En democracia, o único que impera son as leis e non o catecismo", di Sánchez ao bispo, nunha carta aberta que colgou en Twitter, na que lle pide que se desculpe e que siga o exemplo do papa Francisco.
Aquí tenéis mi carta abierta en respuesta al obispo de Alcalá de Henares pic.twitter.com/xaR3TdoOG7
— Pedro Sánchez (@sanchezcastejon) September 25, 2014
"Deixo á marxe a retahíla de insultos e descualificacións persoais; vou ao importante: a ninguén pode beneficialo tanto odio. Nin é bo para a convivencia, nin é bo para a Igrexa, nin é bo para a sociedade", di Sánchez no seu escrito.
O dirixente socialista pide que alguén cun posto de tanta responsabilidade sexa "exemplo de respecto e de dignidade" e lamenta que, en lugar das chamadas á conciliación e o respecto que crentes e non crentes valoran do papa Francisco, nas palabras de Reig Plá ''só haxa desprezo á liberdade e agresión a quen non compartimos as súas ideas". "Non é a primeira vez que este arcebispo nos dá mostras do seu sectarismo -continúa Sánchez-, por iso pregúntome: ¿Onde está o límite? ¿Ata onde imos ter que soportar que agrida a millóns de mulleres e homes, crentes e non crentes?".
Pedro Sánchez conclúe asegurando que ao bispo correspóndelle reflexionar e pedir perdón, e aos demais "seguir avanzando na defensa da liberdade e a tolerancia".
Respecto das referencias persoais ás que se refire Sánchez, o bispo de Alcalá de Henares, consideraba na nota da diocese "asombroso" que o dirixente socialista criticase a violencia do Touro de la Vega e, con todo, "esqueza a violencia criminal contra dous millóns de nenos abortados: decapitados, troceados, envelenados, queimados".
Reig Plá reprochaba ademais ao secretario xeral do PSOE que chamase "tren da liberdade" ao que chegou á estación de Atocha reclamando o dereito de decidir das mulleres, e aseguraba que debería telo chamado "tren da morte, do holocausto máis infame".
