Integrantes de Patrimonio dous Ancares localizaron o pasado fin de semana no municipio de Cervantes unha mámoa e unha nova estación de petróglifos. Estes restos atópanse entre os vestixios desa natureza achados a máis altitude en Galicia. A asociación xa solicitou ao servizo de Patrimonio Cultural da Xunta en Lugo e ao Concello que procedan á súa catalogación, para garantir a súa protección.
Segundo explica o presidente do colectivo, o historiador Xabier Moure, a mámoa, do Neolítico, está a 1.280 metros de altitude, entre as aldeas de Porcís, na parroquia de Noceda, e O Portelo, na de Vilarello, no monte coñecido como O Circo.
Precisa que ten 17 metros de diámetro e un de altura e engade que sobre o túmulo obsérvanse algunhas pedras de cuarzo, algo que podería indicar que estaba cuberta por unha coraza pétrea.
Está preto de dúas mámoas localizadas por Patrimonio dous Ancares a finais do pasado mes de xaneiro. Xabier Moure cre que naquela ocasión pasoulles desapercibida porque «se atopa non medio dunha plantación de piñeiros, mesmo algúns están plantados sobre a mámoa».
Destaca que esta é a terceira mámoa galega descuberta a máis altitude, ao situarse nese ranking tan só por detrás das de Marco Cavado e O Sistil Branco, localizadas nos concellos ourensáns de Chandrexa de Queixa e Manzaneda, a 1.700 metros.
MÁS PETRÓGLIFOS. A asociación tamén descubriu o fin de semana unha nova estación de petróglifos, a décimo cuarta que acha en Cervantes. Atopouna no lugar coñecido como Campo Formoso, a 1.525 metros de altitude, baixo o alto dos Tres Bispos e o pico das Charcas, no límite con León. Moure di que é a cuarta estación de petróglifos en Galicia a máis altura.
Engade que, como os outros grupos de petróglifos achados en Cervantes, está xunto a unha antiga vía de tránsito de montaña, nunha campa. «As coviñas son ocos de planta redonda e sección semiesférica escavadas na superficie da rocha, sendo as representacións máis sinxelas de arte rupestre galega ao aire libre, aínda que quizais as máis enigmáticas», di.
Con este novo achado, elévanse a 14 o número de estacións de petróglifos descubertas pola asociación no municipio
